Meloprim-B12
Tərkibi
Təsiredici maddə: 3 ml məhlulun tərkibində 15 mq meloksikam, 10,08 mq prednizolon, 10 mq
sianikobalamin vardır.
Köməkçi maddələr: benzil spirti, propilenqlikol, dinatrium edetat, natrium metabisulfit, natrium
hidroksid, etanol, inyeksiya üçün su.
Təsviri
Sarımtıl rəngli mayedir.
Farmakoterapevtik qrupu
Oksikamlar. Meloksikam və kombinasiyaları.
ATC kodu: M01AC56.
Farmakoloji xüsusiyyətləri
Meloksikam iltihabəleyhinə, analgetik və qızdırmasalıcı xüsusiyyətlərə malik, oksikamlar qrupuna məxsus qeyri-steroid iltihab əleyhinə preparatdır (QSİƏP). Digər QSİƏP-də olduğu kimi, onun dəqiq təsir mexanizmi məlum deyil. Bununla belə, bütün QSİƏP (meloksikam daxil olmaqla) əhatə edən ən azı bir ümumi təsir mexanizmi var: məlum iltihab mediatorları olan prostaqlandinlərin biosintezinin inhibisiyası.
Prednizolon
Prednizolon iltihab əleyhinə aktivliyə malik qlükokortikosteroiddir.
Sianokobalamin (Vitamin B12)
Sianokobalamin və ya hidroksikobalamin formasında olan Vitamin B12 mielinin sintezi daxil olmaqla, bir çox metabolik proseslərdə öz kofermentləri vasitəsilə təsir göstərir.
İstifadəsinə göstərişlər
Revmatoid artrit və ankilozlaşdırıcı spondilitin kəskinləşməsinin qısamüddətli simptomatik müalicəsi.
Əks göstərişlər
- Preparatın istənilən komponentinə qarşı yüksək həssaslıq;
- digər QSİƏP-lara qarşı yüksək həssaslıq;
- QSİƏP istifadəsinə bağlı mədə-bağırsaq qanaxması və ya perforasiyası;
- aktiv qastroduodenal xora;
- mədə-bağırsaq qanaxması, serebrovaskulyar qanaxma, digər qanaxma pozğunluqları;
- ağır qaraciyər xəstəliyi və böyrək çatışmazlığı;
- ağır ürək çatışmazlığı;
- canlı peyvəndlər;
- xüsusi göstərişi olmayan bütün yoluxucu vəziyyətlər;
- bəzi viruslar (hepatit, herpes, varicella zoster kimi);
- müalicə olunmayan və ya idarə olunmayan psixi vəziyyətlər;
- Leber xəstəliyi;
- sistem göbələk xəstəliyi;
- hamiləlik və laktasiya;
- 16 yaşa qədər uşaqlar.
Xüsusi göstərişlər və ehtiyat tədbirləri
Əlavə təsirlər tez-tez dərman vasitəsini yaxşı mənimsəməyən yaşlı, kövrək və ya zəifləmiş şəxslərdə müşahidə edilir və buna görə də belə xəstələrin diqqətli monitorinqi zəruridir. Digər QSİƏP-də olduğu kimi bu dərman vasitəsini də istifadə edərkən böyrək, qaraciyər və kardioloji disfunksiyanın tez-tez müşahidə edildiyi yaşlılarda xüsusilə ehtiyatlı olmaq lazımdır. Yaşlılarda QSİƏP istifadəsi fonunda, xüsusən də ölümcül nəticələnə bilən mədə-bağırsaq qanaxmalarının və perforasiyanın başvermə tezliyi artır.
Meloksikam, digər QSİƏP olduğu kimi, əsas infeksion xəstəliyin simptomlarını maskalaya bilər. Əzələdaxili istifadə edilən bütün QSİƏP-də olduğu kimi, inyeksiya yerində abses və nekroz inkişaf edə bilər. Meloksikam siklooksigenaza/prostaqlandin sintezini inhibə edir, fertilliyi zəiflədə bilər və hamilə qalmağa cəhd edən qadınlarda istifadəsi məsləhət görülmür. Hamilə qalmaqda çətinlik çəkən və ya sonsuzluqla bağlı araşdırma aparılan qadınlarda meloksikamın istifadəsinin dayandırılması nəzərdən keçirilməlidir.
Müalicə zamanı vəziyyəti nəzarət etmək üçün ən aşağı effektiv dozadan istifadə etmək lazımdır. Preparatın tərkibində kiçik miqdarda kortikosteroid olsa da, dozalar vəziyyətə və xəstənin reaksiyasına uyğun olaraq, xüsusən də fiziki və ya emosional stress, əməliyyat və ya zədələnmə hallarında korreksiya edilməlidir. Doza tədricən azaldılmalı və bu proses tibbi nəzarət altında aparılmalıdır
Kortikosteroid terapiyasının qəflətən dayandırılması ikincili böyrək çatışmazlığına səbəb ola bilər. Qarşısını almaq üçün bu proses mərhələli şəkildə aparılmalıdır. Hər halda, əlaqəli çatışmazlıq terapiya dayandırıldıqdan sonra bir neçə ay davam edə bilər, buna görə də bu dövrdə baş verən hər hansı bir stress kortikosteorid terapiyasının bərpasını və ya dozanın artırılmasını zəruri edir.
Kortikosteroidlərin immunosupressiv dozalarını qəbul edən xəstələrdə canlı vaksinlərin istifadəsi əks göstərişdir. İnaktivləşdirilmiş virus və ya bakterial peyvəndlər istifadə edilərsə, gözlənilən zərdab anticisim reaksiyası baş tutmaya bilər.
Kortikosteroidlər bəzi infeksiya əlamətlərini maskalaya bilər və onların istifadəsi zamanı yeni infeksiyalar inkişaf edə bilər. Rezistentliyi və infeksiyanın lokallaşmasını azalda bilər. Daha çox kortikosteroid istifadəsi bakterial infeksiya üçün aparılan nitroblue tetrazolium testinə müdaxilə edə və nəticədə yanlış mənfi nəticələr əldə edilə bilər.
İkiqat kor sınaqda serebral malyariya zamanı kortikosteroidlərin istifadəsi uzunmüddətli koma, mədə-bağırsaq qanaxması və pnevmoniyanın yüksək tezliyi ilə əlaqələndirilmişdir.
Kortikosteroidlər gizli amöbiazı aktivləşdirə bilər. Buna görə də, kortikosteroid terapiyasına başlamazdan əvvəl latent və ya aktiv amöbiazı istisna etmək məsləhət görülür. Kortikoidlərin uzun müddət istifadəsi arxa subkapsulyar katarakta, optik sinirin mümkün zədələnməsi ilə müşayiət olunan qlaukoma ilə nəticələnə bilər və virus, göbələk infeksiyalarının yaranmasına səbəb ola bilər.
İmmunosupressiv preparatlar qəbul edən xəstələr sağlam insanlara nisbətən infeksiyaya qarşı daha həssasdırlar. Kortikosteroidlər Strongyloides hiperinfeksiyası, tez-tez ağır enterokolit və potensial ölümcül qram-sepsis ilə müşayiət olunan geniş sürfə miqrasiyası ilə yayılan xəstələrdə çox ehtiyatla istifadə edilməlidir.
Gizli vərəm və ya tuberkulin reaktivliyi olan xəstələrdə kortikosteroidlərin istifadəsi göstərişdirsə, bu proses həkim nəzarəti altında aparılmalıdır, çünki, xəstəliyi aktivləşdirə bilər. Kortikosteroidlə müalicə müddətində bu xəstələr kimyaprofilaktika qəbul etməlidir. Ədəbiyyat məlumatları kortikosteroidlərin istifadəsi ilə yaxınlarda keçirilmiş miokard infarktından sonra sol mədəciyin sərbəst divarının yırtılması arasında əlaqənı dəstəkləyir. Belə pasiyentlərdə kortikosteroidlər ehtiyatla istifadə edilməlidir
Uzunmüddətli istifadədən sonra kortikosteroidlərin dayandırılması qızdırma, mialgiya, artralgiya və halsızlıqla müşayiət olunan “ləğvetmə” sindromu ilə nəticələnə bilər. Bu hal hətta adrenal çatışmazlıq əlamətləri olmayan xəstələrdə də inkişaf edə bilər.
Buynuz qışanın perforasiyası riskinə görə okulyar herpes simplex olan xəstələrdə kortikosteroidlər ehtiyatla istifadə edilməlidir.
Kortikoidlərin təsiri hipotiroidizm və ya sirroz olan xəstələrdə artır.
Kortikosteroidlə müalicə müddətində eyforiya, yuxusuzluq, əhval-ruhiyyədə dəyişiklik, depressiya və ya şəxsiyyət pozğunluqları, hətta ağır depressiya və ya psixoz kimi psixoloji pozğunluqlar inkişaf edə bilər. Həmçinin, mövcud psixi meyillər və ya emosional qeyri-sabitlik kortikosteroidlərin istifadəsi ilə daha da ağırlaşa bilər. Qeyri-spesifik xoralı kolitdə, perforasiya, abses və ya digər piogen infeksiya ehtimalı varsa, həmçinin divertikulit, yeni bağırsaq anastomozları, aktiv və ya latent mədə xorası, böyrək çatışmazlığı, hipertoniya, osteoporoz və miasteniya qravis zamanı steroidlər ehtiyatla istifadə edilməlidir.
Digər dərman vasitələri ilə qarşılıqlı təsiri
Məlumat yoxdur.
Hamiləlik və laktasiya dövründə istifadəsi
Hamiləlik
Bu dərman vasitəsinin hamiləlik dövründə təhlükəsizliyi müəyyən edilməmişdir. Əks göstərişdir.
Laktasiya
Kortikosteroidlər insan südünə keçir və böyüməni supressiya edə, endogen kortikosteroid sintezini inhibə edə və ya digər arzuolunmaz effektlərə səbəb ola bilər. Əks göstərişdir.
Nəqliyyat vasitələrini və digər potensial təhlükəli mexanizmləri idarəetmə qabiliyyətinə təsiri
Bu dərman vasitəsinin avtomobil və digər təhlükəli mexanizmləri idarəetmə qabiliyyətinə təsirinə dair müşahidələr aparılmamışdır. Lakin görmə ilə bağlı pozğunluqlar, başgicəllənmə, yuxululuq kimi hallar yarandıqda, pasiyentlər avtomobil və digər təhlükəli mexanizmləri idarə etməkdən çəkinməlidirlər.
İstifadə qaydası və dozası
Əzələdaxili inyeksiya
Gündə 1 ampul istifadə edilir.
Müalicə müddəti 2-3 gündür.
16 yaşdan aşağı uşaqlarda istifadə olunmur.
Ağır böyrək və qaraciyər çatışmazlığı zamanı əks göstərişdir.
Əlavə təsirləri
Klinik sınaqlar və epidemioloji məlumatlar bəzi QSİƏP-ın (xüsusilə yüksək dozalarda və uzunmüddətli müalicədə) arterial trombotik hadisələr riskinin kiçik tezlikdə artması ilə əlaqələndirilməsini dəstəkləmişdir. QSİƏP müalicəsi fonunda ödem, hipertoniya və ürək çatışmazlığı bildirilmişdir.
Ən çox müşahidə olunan əlavə təsirlər mədə-bağırsaq traktında inkişaf edir. Peptik xoralar, perforasiya və ya mədə-bağırsaq qanaxmaları, bəzən ölümcül nəticələnə bilir və bu hal, xüsusilə yaşlılarda baş verə bilər. QSİƏP-ın qəbulundan sonra ürəkbulanma, qusma, ishal, meteorizm, qəbizlik, dispepsiya, qarın ağrısı, melena, hematemez, xoralı stomatit, kolit və Kron xəstəliyinin kəskinləşməsi bildirilmişdir. Qastrit daha kiçik tezlikdə müşahidə edilmişdir.
Doza həddinin aşılması
Qlükokortikoidlərlə doza həddinin aşılması fonunda nadir hallarda toksiklik və ya ölüm halları bildirilmişdir. QSİƏP ilə kəskin doza həddinin aşılmasının simptomları adətən letargiya, yuxululuq, ürəkbulanma, qusma və epiqastrik ağrı, mədə-bağırsaq qanaxması ilə məhdudlaşır, lakin çox nadir hallarda hipertoniya, kəskin böyrək çatışmazlığı, tənəffüs depressiyası və koma da baş verə bilər.
Doza həddinin aşılmasının ilkin müalicəsi
Xəstəni diqqətli şəkildə klinik qiymətləndirdikdən sonra, son qəbuldan və ya qəbuldan sonra keçən vaxtın əhəmiyyəti, qəbul edilmiş dozanın miqdarı və müəyyən əks göstəriş olan prosedurları nəzərdən keçirdikdən sonra tibb işçisi hansı tədbirin istifadəsinə qərar verəcəkdir: qusma və ya mədənin yuyulması, aktivləşdirilmiş kömür və işlədici fizioloji məhlul (aktivləşdirilmiş karbondan 45-60 dəqiqə sonra), hemodializ.
Buraxılış forması
3 ml məhlul şüşə ampulda. 5 ampul içlik vərəqə ilə birgə karton qutuya qablaşdırılır.
Saxlanma şəraiti
30ºC-dən aşağı temperaturda, işıqdan qorunan və uşaqların əli çatmayan və quru yerdə saxlamaq lazımdır.
Utilizasiyası və digər işlər zamanı xüsusi ehtiyat tədbirləri
İstifadə edilməyən dərman vasitələri və onların tullantıları “Tıbbi tullantılara nəzarət qaydaları” və “Qablaşdırmalara və qablaşdırma tullantılarına nəzarət qaydaları”-na müvafiq olaraq atılmalıdır.
Yararlılıq müddəti
3 il.
Yararlılıq müddəti bitdikdən sonra istifadə etmək olmaz.
Aptekdən buraxılma şərti
Resept əsasında buraxılır.
